21 setembro 2010

A canción do "paragüeiro". (Trasmonte)

Balcón nunha casa de Trasmonte*
Non esquecemos a literatura popular a pesar de que nestes últimos tempos non publicasemos grande cousa con ela relacionada. No libro xa citado noutras entradas de  Fidalgo Santamarina: Antropología de una parroquia rural, aparece recollida esta cantiga popular que leva por título a "Canción do paragüeiro".
Os afiadores e paraugueiros, xuntos cos talabarteiros, canteiros, xastres , músicos e un longo etc, percorrían as terras galegas ofertando as súas artes para poder ir indo.
Homes, solteiros ou casados, tanto tiña, homes eran e nas aldeas as rapazas recibíanos expectantes co quel de ser alguén de fóra do entorno o que conlevaba certo misterio que os facía ser centro de atención. 
A presenza destes ambulantes orixinou máis de un malentendido e seguramente máis dunha liorta co mundo masculino foráneo.
Nesta cantiga que pasamos a transcribir queda claro o que aquí deixamos escrito.  
Podemos escoitar  outra versión na web Vou nun Bou .

Preguntei se sería certo
o que lin nunha revista
que os mellores paragüeiros
saen da terra da chispa.

Afiador e paragüeiro
arregla potas e porcelanas,
compra ferraganchos de cobre
trapos vellos e mais lanas;
e tamén teñen o vicio
de subir polas ventanas. 

Mina irmá ten unha filla
de trinta anos e pico
que non a deixa casar
ata que lle veña un rico.

E ela ben o merecía
porque era moi elegante
ten unha casa ben posta
cun bo lameiro por diante.

Veu un día o paragüeiro
e subiu pola ventana
alá pola media noite
xa se atopaban na cama.

E de alí a pouco tempo
atopuse moi maliña
eu mesmo funlle chamar
ó médico da familia

Deulle fregas á barriga
púxolle inxeccións de suero
tamén lle dixo que tiña
principios dun paragüeiro.

Mina irmá e o meu cuñado
ó saber ó contenido
empezaron a chorar
formando grande alarido.

Pensaron dentro dun pouco
que chorar é perder tempo
chamaron ó paragüeiro
e tratouse o casamento.

Pero o malvado do home
non se quixo conformar
e iba xunto das veciñas
que o deixasen amar.

*Trasmonte é a parroquia motivo do estudo do libro que citamos nesta entrada.

0 comentarios:

 
Creative Commons License
Esta obra publícase baixo unha Licenza de Creative Commons.