Remedios contra a rabia

Se padeces de rabia, na igrexa de Santiago de Miraz ofrecen ou ofrecían unha solución. Pero antes pensa se optas pola rabia. Aquí venérase a Santo Eutelo, capaz de curar a rabia. Un veciño, encargado de gardar as chaves benditas da igrexa, era o encargado de practicar o rito de curación. Na súa casa era recibido o afectado, e facíalle unha cruz na fronte cunha chave incandescente. Despois tiña que ir á casa do cura, quen bendicía o pan e a auga, á que lle engadía sal, e que o mordido tiña que tomar en nove días. Supoñemos que esta práctica pasou á historia, e non sabemos ata cando foi habitual. Se sabedes algo máis engadide un comentario.