As Cantinas multitenda.

Para cubrir as necesidades que cadaquén tiña na súa casa e que non eran cubertas pola produción da mesma, foron aparecendo tendas de comestibles que, ao mesmo tempo, funcionaban como cantinas, e que a maiores, ofrecían outras mercadorías para completar os utensilios domésticos –dependendo xa, do criterio dos propietarios--.

Mostrador corrido, e por tras, estantes que mostraban os produtos con máis saída do momento, ou simplemente a modo de reclamo. A invasora publicidade que hoxe soportamos aínda estaba en fase incipiente e o seu soporte eran calendarios , chapas máis ou menos policromadas e pouco máis.

A foto que acompaña esta entrada cremos que está feita no ano 1966 ou no 68. Con pouco máis de 40 anos, hoxe, desde a perspectiva urbana, parécenos reflectir un pasado afastado, cando na nosa contorna aínda quedan destas “toderías” (das que xa falamos na entrada dedicada á feira de Roimil ) coas mesmas funcións económicas e sociais.

A fotografía cedida por Elena Moreno, é da tenda que a súa familia posuía no Carballo.

Con esta entrada despedimos este ano 2.009, esperando seguir co mesmo ánimo para encarar novos retos nesta viaxe iniciada no 2.008.