Dentro da VI invernada de cine organizada pola Asociación de Veciños de Cabreiros (Xermade), convidados pola organización, o próximo día 17 de novembro, sábado ás seis da tarde o Grupo de Teatro Accidental Carballo Vivo representará "Unha escola en branco e negro" montaxe estreada no mes de maio en Carballo (Friol).
Este divertimento recrea o día a día dunha
escola pública do rural galego, no que se intercalan monólogos cargados
do mesmo humor crítico que impregna toda a representación.
Tanto os diferentes cadros como os monólogos repasan o que foi unha
escola tradicional ben aproveitada polo nacional-catolicismo imperante ao
longo da ditadura franquista.
Achéganos ao que foi, para moitos, un ensino xerador de
súbditos no que importaba máis o memorístico e a repetición de
consignas que agradasen ao réxime, cá formación de verdadeiros
cidadáns e cidadás con capacidade crítica.
A relixión, a lingua, o leite americano, os cánticos patrióticos, o desleixe co
próximo na aprendizaxe, o desigual trato do alumnado, o patriarcado
presente na educación das nenas,… mestúranse coa frescura dunhas
alumnas que non esquecen o seu e, sen seren conscientes, defenden unha cultura
deturpada polo réxime a través de xogos e cancións de noso. Exemplo
claro do proceso dialéctico que acabou derrubando os muros desta escola
anquilosada.
Distinguir o real do ficticio é un exercicio que o grupo deixa na man dos espectadores.
É a primeira experiencia interpretativa fóra do ámbito municipal (haberá máis) e esperamos acadar a mesma acollida e o mesmo éxito que tivemos nas nosas anteriores actuacións.
.jpg)
.png)
0 comments:
Publicar un comentario