Chega o Nadal

De seguir á publicidade, ás áreas comerciais e á luminaria das cidades, é evidente que estamos xa no inicio das festas do Nadal. Nós, que tampouco queremos quedármonos atrás --aínda que os motivos sexan outros-- aproveitamos este ciclo festivo para recuperar algún dos cantos que se escoitaban por estas terras nas propias datas "navideñas". A fins dos anos noventa do pasado século, Mini e Mero andaron estes "países" recollendo o folclore típico, investigación da que deixaron constancia na páxina Nadal en Galicia.

Aquí traemos un canto presente en toda Galicia, con diferentes variantes. Así Dorothe Schubarth e Antón Santamarina téñeno recollido no seu "Cancioneiro Popular Galego" en Mazaricos, Dumbría, Vimianzo, Ribadumia, Frades, Arzúa,... O que transcribimos foi recollido na parroquia de Trasmonte, polo, múltiples veces citado, Fidalgo Santamariña. Di así:

"A noitiña de Nadal,

noite de grande alegría

naceu un reisiño novo

fillo da Virxen María.

Camiñando vai José

camiñando vai María;

camiñan para Belén

a fin de chegar con día.

Cando a Belén chegaron

xa toda a xente durmía,

menos un pobre porteiro

que estaba na portería.

--Abre as portas porteiro,

a José e a María.

--Estas portas non se abren

hastra que dios traiga o día.

Cando o día xa saleo,

a Virxen tiña un meniño;

tanta era a súa pobreza

con que envolvelo non tivo.

Botou as mans ó pescozo

e dunha cofia que tiña

fixo dela tres pedazos

con un  a Cristo envolvía.

Baixou un ánxel do ceo

e bos pañuelos traía;

unhos eran de hilaza

outros de hilaza fina.

Subeu un ánxel pró Ceo

cantando a Ave María;

preguntoulle o Padre Eterno

cómo quedaba María.

--María queda moi ben

na súa cama recollida;

e o Neno queda chorando,

polos pecados que había". 

Se queredes escoitar unha versión desta panxoliña interpretada poas voces do grupo "Xacarandaina" premede aquí .