Historias locais narradas por Quiroga (III)

O Venido, do que xa falamos anteriormente, na súa época de ir á escola tocoulle como mestre a don Salvador Carballal Palmeiro -- prócer do ensino --

Este don Salvador, tiña o bo costume de ensinar por medio de exemplos plásticos e visuais, que permitisen aos educandos percibir mellor os contidos das leccións. Así para explicar que a terra era redonda levaba sempre unha laranxa ou unha mazá...

Nesta ocasión, a lección era de xeografía e o mestre levaba canda si unha 'palangana' chea de auga. Trataba a lección das illas, istmos, penínsulas e arquipélagos.

Despois da correspondente teórica,  don Salvador, salpicou na palangana unha migalla de pan, preguntándolle ao bo de Venido.

-- Vamos a ver, que representa esta figura? 

-- Don Salvador, esa é unha illa. 

-- E se botamos dúas ou tres ? -- seguiu preguntando o mestre--

-- Se son dúas ou tres, serán dúas ou tres illas -- respostou solicito o noso home

-- Moi ben ,moi ben --dixo o mestre--- Agora imaxínate que salpicamos moitas migas de pan, que representan? 

Respostando sen dubidalo, di o Venido.

--Se bota moitas, don Salvador, serán sopas.

Estaba claro que a idea era de que contestase un arquipélago.