Manuel Andón (II) A década dos sesenta

O gobernador na escola de Vilafiz. 1966

A década dos sesenta e os primeiros anos dos setenta -- que coinciden coa alcaldía de Andón-- xerarán unhas expectativas que posteriormente non se souberon, non se quixeron ou non se puideron aproveitar.

Inícianse os sesenta coa publicación do interese da "Junta Nacional de Energía Nuclear", nas terras deste concello, debido á posible existencia de minerais radioactivos - uranio--; o que orixina prospecións no concello: concretamente na parroquia de Guldriz (postos de traballo).

No mesmo ano o gobernador civil (Enrique Otero) volve a Friol para inaugurar as escolas en Cotá, Prado e Carlín, coincidindo coa celebración oficial do 1 de maio--data emblématica do franquismo--

Ao ano seguinte, xa con novo gobernador civil --Azcárraga Bustamante--  séguese o ritmo de creación de escolas e en xullo visita o concello para inaugurar as de Ramelle, Narla e A Porreira.. Aproveita a viaxe o señor gobernador para inaugurar diferentes vías de comunicación interparroquial e a Ponte do Batán  sobre o río Parga. Neste ano os veciños expoñen diante das autoridades, a necesidade de pavimentación das rúas da vila.

Visita á Casa Sindical.1966

Poucos meses despois, xa no 62 inícianse as obras de urbanización do contorno do Campo da Feira. No 63 o concello consegue que o Dr. López Suárez fixese doazón dos terreos para a construción do centro escolar da vila e un campo de deportes -cremos que no logro desta cesión tivo bastante que ver o que era secretario do xulgado D. Germán Mariño Curto, por ser este, veciño do benfeitor.--

Friol empeza a medrar, e nótase a man de Andón e os seus apoios políticos dentro e fóra do concello. A súa presenza na Deputación Provincial - recorda Sánchez Carro-- era unha continua esixencia de obras e reformas "para o o concello que o vira nacer". 

No 1964, é o alcalde o encargado de realizar a Ofrenda a Jesús Sacramentado en Lugo diante do bispo da diocese Ona de Echave, xa con novo gobernador civil (Eduardo del Río Iglesia)

Neste mesmo ano Friol -a vila-- accede ao servizo telefónico, servizo polo que andaron anos atrás del, e supuxo fortes desembolsos económicos por parte do vecindario interesado no mesmo.

A casa sindical é inaugurada un anos despois. Este edificio acollerá  a inauguración da Exposición itinerante "XXV Anos de Paz"- que formaba parte da maquinaria propagandística do réxime preparando o famoso referendo do 66.

No mesmo 1965 créase  o primeiro teleclub do concello e, un dos primeiros de non só de Galicia senón de España: o de Ousá.

Inauguración da estrada que une Narla coa Devesa.1966

1966 acolle o referendo do Proxecto de Lei da Lei Orgánica do Estado, o famoso Si a Franco obténdose uns resultados en Friol semellantes aos do resto do país: o 86'3% deu un si, sendo só 14 os votos nulos ou negativos.

A Emisora Radio Lugo crea ese ano uns premios para agasallar aos mellores alcaldes da provincia: Andón Cebreiro é un dos premiados debido "á urbanización do Campo da Feira antes citada, polo seu traballo na electrificación do rural do concello, o embelecemento da vila, e a política de construción de estradas". É tamén o ano elixido pola daquela Caixa de Aforros da Coruña e Lugo para instalar unha sucursal na vila, promocionando a súa apertura cun sorteo entre os seus clientes.

Manolo Andón non descoidou o aspecto festivo no seu labor, dándolle un forte pulo ás festas locais por excelencia as da "Santa Isabel", --dos palcos e o seu aspecto comunitario xa falamos noutras entradas--; hai que dicir que era o propio alcalde o que dirixía a actividade "como un máis". A fins dos sesenta o propio concello promociona diferentes concursos fotográficos, xornalísticos, poéticos,... que tiñan como eixo fundamental a posta en valor do concello. Tamén tenta recuperar as festas do patrón (S.Xiao) en xaneiro e mesmo a celebración do S. Cidre por maio sen demasiado éxito.

Nestes derradeiros anos dos sesenta séguense creando escolas, electrificando parroquias-- Guldriz,O Pacio, Serén, S. Cibrao e Seoane da Pregación, Condes, Xiá, Vilafiz--creando teleclubs - A Devesa--

Así entramos nos setenta que os deixamos para a vindeira entrada.